Hvert mark FH-inga er 2,3 stiga virði

FH-ingar hafa aðeins skorað þrjú mörk í fyrstu þremur umferðunum í Pepsi-deild karla í fótbolta en eru engu að síður í öðru sæti deildarinnar með sjö stig af níu mögulegum. Það hafa sjö lið skorað fleiri mörk en FH í sumar en aðeins Skagamenn hafa fengið fleiri stig.

FH er aðeins annað liðið frá aldarmótum sem hefur náð í sjö stig í fyrstu þremur umferðunum þrátt fyrir að skora ekki fleiri en þrjú mörk í leikjunum þremur. Fylkismenn afrekuðu þetta einnig sumarið 2009, unnu þá 1-0 og 2-0 sigur í fyrstu tveimur leikjum sínum og gerðu síðan markalaust jafntefli í þeim þriðja.

FH-ingar lentu 0-1 undir á móti Grindavík í fyrstu umferðinni en tókst að jafna og tryggja sér eitt stig. FH-ingar hafa síðan unnið tvo síðustu leiki með sigurmarki á síðustu ellefu mínútum leikjanna. FH-ingar hafa enn ekki skorað á fyrstu 75 mínútum leikja sinna í sumar.

FH-ingar hafa ekki fengið færri mörk á sig í fyrstu þremur umferðunum í sex ár eða síðan að þeir voru með fullt hús og markatöluna 7-1 eftir þrjár umferðir sumarið 2006.

Flest stig hjá liðum sem hafa bara skorað 3 mörk eða minna eftir 3 umferðir:

(Frá 2000 til 2012)

7 - FH 2012

7 - Fylkir 2009

6 - Valur 2011

6 - ÍBV 2011

6 - Fylkir 2007

6 - KR 2006

6 - Breiðablik 2001

6 - ÍA 2000 (2 mörk)



Markatala FH í fyrstu þremur umferðunum undanfarin ár:

2012 - 3-1 (7 stig)

2011 - 5-3 (4 stig)

2010 - 5-5 (4 stig)

2009 - 5-4 (6 stig)

2008 - 10-4 (7 stig)

2007 - 9-3 (9 stig)

2006 - 7-1 (9 stig)

2005 - 11-1 (9 stig)

2004 - 2-2 (4 stig)

2003 - 5-1 (5 stig)