Leðurblökumaðurinn er raunverulegur

Leðurblökumaðurinn er raunverulegur og hann býr í Silver Spring, rétt utan við Washington í Bandaríkjunum. Hann heitir Lenny B. Robinson og er 48 ára gamall, þriggja barna faðir.

Það voru lögreglumenn í Silver Spring sem upphaflega greindu frá ferðum hetjunnar. „Þetta er svartur Lamborghini. Ökumaðurinn virðist vera klæddur eins og Leðurblökumaðurinn," sagði lögregluþjónninn í talstöð sína. „Þið getið boðað Robin á staðinn ef nauðsyn krefur."

Myndband sem lögregluþjónarnir náðu af eltingarleiknum við sportbílinn hefur vakið mikla athygli á veraldarvefnum. Robinson var þó ekki að eltast við illmenni - hann var á leið á barnaspítalann.

Daginn eftir var greint frá nafni Leðurblökumannsins á forsíðu bandaríska fréttablaðsins The Washington Post.

Robinson uppgötvaði Leðurblökumanninn fyrir 12 árum. Sonur hans heillaðist af hetjunni og brátt fór Robinson að taka eftir aðdáunarverðum gildum hans.

„Hann er vissulega ofurhetja - samt sem áður hefur hann enga ofurmannlega krafta," sagði Robinson í viðtali við ABC fréttastofuna. „Í raun getum við öll verið Leðurblökumaðurinn."

Robinson efnaðist mjög þegar hann seldi hreinsunarfyrirtæki sitt fyrir nokkrum árum. Rétt eins og Bruce Wayne notaði Robinson auðævi sín til að helga líf sitt hinum réttmæta málstað. Hann eyddi rúmlega 600.000 krónum í hanna og smíða búninginn sem er 16 kíló að þyngd. Það tekur Robinson 45 mínútur að fara í búninginn.

Því næst hoppar Robinson í Lamborghini-inn og brunar á næsta barnaspítala - hann var einmitt á leið á sjúkrahúsið þegar hann var stöðvaður af lögregluþjónum í Silver Spring.

Robinson hefur heimsótt fjölda barnaspítala í gervi Leðurblökumannsins. Hann ræðir við börnin um veikindi þeirra og gefur þeim leikföng.

„Þið verðir ávallt að hugsa um batann - á hverjum einasta degi," segir Robinson við börnin. „Þið eruð hinar raunverulegu ofurhetjur.

Hægt er að sjá myndbandið sem lögregluþjónarnir náðu hér fyrir ofan.