Sendu 770 þúsund pakka af vítamínbættu hnetusmjöri til Sómalíu

Íslendingum tókst að minnka verulega skaðann af hrikalegri hungursneyð í Sómalíu á síðasta ári með því að styðja myndarlega við bakið á Rauða Krossinum.

Þetta kemur fram í grein eftir Þórir Guðmundsson sviðsstjóra hjálparstarfssviðs Rauða krossins á Íslandi sem birtist í Fréttablaðinu og á Vísi í morgun.

Í greininni kemur fram að Íslendingar hafi gefið Rauða Krossinum 57 milljónir króna alls vegna hungursneyðarinnar í Sómalíu.

Góðgerðarsamtökin byrjuðu á því að senda 770 þúsund pakka af vítamínbættu hnetusmjöri til 20 þúsund barna, sem þjáðust af alvarlegum næringarskorti í sunnanverðri Sómalíu. Síðar sendu þeir skjólefni, hreinlætispakka og eldunaráhöld til aðstoðar um 30 þúsund flóttamönnum norðar í landinu.

Árangurinn er góður að sögn Þóris, þó auðvitað megi alltaf gera betur. „Í framtíðinni aukast lífsgæði hirðingja og lífslíkur barna þeirra fyrir aðstoð Rauða krossins á Íslandi.

Íslenskur almenningur, sem styður þetta starf, getur verið stoltur af árangrinum," skrifar Þórir að lokum.

Hægt er að lesa grein hans í viðhengi hér fyrir neðan.