Leyniskytta felldi Merah

Saksóknari í Toulouse í Frakklandi segir að fjöldamorðinginn Mohammed Merah hafi látist eftir að leyniskytta skaut hann í höfuðið. Umsátri um íbúð Merah lauk fyrr í dag, rúmum 32 klukkustundum eftir að það hófst.

Sérsveit frönsku lögreglunnar ruddist inn í íbúð Merah í morgun. Merah skaut að lögreglumönnum og særði tvo. Samkvæmt saksóknara var Merah í skotheldu vesti og vopnaður hríðskotabyssu og skammbyssu. Leyniskytta skaut Merah þegar hann reyndi að flýja út um glugga íbúðarinnar.

Rannsókn hefur leitt í ljós að Merah hafði ætlað að útbúa Molotov-eldsprengjur.

Merah hafði lýst yfir ábyrgð á sjö morðum í suðurhluta Frakklands. Þar á meðal viðurkenndi hann að hafa orðið þrem börnum að bana við gyðingaskóla i Toulouse.

Fyrr í vikunni var greint frá því að Merah hafi tekið ódæðin upp á myndband. Rannsóknarmenn gátu staðfest þetta í dag en myndbandsupptökurnar fundust í íbúðinni.