Anonymous réðust á kínverskar heimasíður

Tölvuhakkarahópurinn Anonymous er sagður hafa ráðist á 500 opinberar heimasíður í Kína sem nú liggja niðri.

Margar síðurnar tilheyra hinu opinbera auk fjölda annarra síðna tengdum stjórnvöldum. Hakkararnir skildu eftir skilaboð á síðunum þar sem ritskoðun stjórnvalda á netinu er mótmælt. Þá má einnig finna hlekki inn á heimasíður sem eru til þess fallnar að kenna notendum að hylja slóð sína vilji þeir tjá sig frjálslega. Á vef BBC segir þó að síðurnar séu á ensku, því sé óljóst hversu gagnlegar þær séu fyrir Kínverja.

Árásin er viðbrögð við umfangsmiklum aðgerðum Kínverja þar sem fjölda heimasíða hefur verið lokað, bæði vegna orðróms um að valdarán hefði verið í bígerð í landinu, en kínversk yfirvöld hafa einnig handtekið fjölda meintra tölvuþrjóta í landinu.

Kínversk stjórnvöld neita alfarið að árásin hafi átt sér stað. Fram kemur á fréttavef BBC að skilaboðin megi engu að síður finna á fjölmörgum síðum auk þess sem aðrar opinberar heimasíður liggja niðri þessa stundina.