Samið um fækkun hermanna á Okinawa eyju

Japönsk og bandarísk stjórnvöld hafa komist að samkomulagi um að draga verulega úr fjölda bandarískra hermanna á Okinawa eyju.

Alls verða 9.000 bandarískir hermenn sendir frá Okinawa og þeim komið fyrir á Guam, Hawai og öðrum eyjum í Kyrrahafinu. Eftir verða hinsvegar 10.000 hermenn á Okinawa.

Í frétt um málið á BBC segir að hinsvegar hafi enn ekki náðst samkomulag um að leggja niður hinn umdeilda herflugvöll við Futenma á eyjunni. Það mál verður rætt á fundi þeirra Baracks Obama bandaríkjaforseta og Yoshihiko Noda forsætisráðherra Japans í Washington í næstu viku.