Kony 2012 er vinsælasta myndband allra tíma

Heimildarmyndin Kony 2012 er vinsælasta netmyndband allra tíma. Myndbandið fékk rúmlega 100 milljón áhorf á sex dögum.

Joseph Kony, leiðtogi Lord Resistance Army (LRA), er því vinsælli en bæði Justin Bieber og Susan Boyle.

Það var vefsíðan Visible Measures sem tók saman upplýsingarnar. Pistlahöfundar síðunnar mældu þann tíma sem það tók Kony 2012 að fá 100 milljón áhorf og báru niðurstöðurnar saman við nokkur af vinsælustu myndböndum netheima.

Til samanburðar tók það Justin Bieber og smellinn „Baby" um 56 daga að fá 100 milljón áhorf. Susan Boyle, sem gerði garðinn frægan eftir að hafa komið fram í raunveruleikaþættinum Britain's Got Talent, var komin með 70 milljón áhorf eftir sex daga. Hún náði síðan 100 milljóna takmarkinu eftir 9 daga.

Visible Measures mældu ekki aðeins áhorf heldur einnig viðbrögð og umtal. Þannig hafa 500.000 manns birt ummæli um myndbandið.

Samtökin Invisible Children, sem standa að baki Kony 2012, hafa verið harðlega gagnrýnd fyrir starfshætti sína. Þá aðallega með tilliti til fjármála samtakanna og er því haldið fram að söfnunarfé sé ekki dreift með eðlilegum hætti til hjálparsamtaka.

En forsvarsmenn Kony 2012 hafa nú svarað gagnrýninni. Ben Keesey, stjórnarformaður Invisible Children, segir í nýlegu myndbandi að samtökin hafi náð takmarki sínu með því að benda á voðaverk Joseph Kony.

Hægt er að horfa á svar Ben Keesey hér fyrir ofan. Það er síðan hægt að horfa á Kony 2012 heimildarmyndina hér.