Björguðu íkorna sem festist í ræsisloki

Það er óhætt að segja að það hafi skapast dálítið neyðarástand á dögunum þegar vegfarandi í München í Þýskalandi gekk fram hjá ræsisloki og sá þá að íkorni sat þar fastur. Allt í kring óku bílar og því ljóst að nagdýrið var í bráðri lífshættu þar sem það gat ómögulega losað sig. Talið er að íkorninn hafi ætlað að grafa hnetuna sína í ræsinu þegar hann festi sig.

Vegfarandinn samúðarfulli brást hárrétt við og hringdi á slökkviliðið sem kom á vettvang vel búið til þess að bjarga dýrinu. Þeir byrjuðu á því að losa ræsislokið og færa það frá umferðinni. Því næst reyndu þeir að losa íkornann með sápu, en það dugði ekki til.

Þá voru góð ráð dýr, slökkviliðsmennirnir brugðu því á það ráð að beita járnklippum, svipuðum og þeim sem notaðar eru til þess að klippa farþega lausa úr bílum eftir umferðarslys, til þess að losa dýrið. Það hafðist að lokum.

Talsmaður slökkviliðsins sagði íkornann hafa verið ansi pirraðann eftir vistina. „Eðlilega," bætti hann skilningsríkur við. Nagdýrið stökk því næst upp í næsta tré án þess að þakka fyrir sig en líklega frelsinu fegið.