David Moyes: Þið sáuð allar vörslurnar hans David de Gea

David Moyes, stjóri Everton, var að sjálfsögðu himinlifandi með 1-0 sigur á Manchester United á Goodison Park í kvöld í síðasta leik fyrstu umferðar ensku úrvalsdeildarinnar.

„Mér fannst við spila svo vel í þessum leik. Við urðum að grafa djúpt eftir þessum sigri en við náðum oft mikilli pressu og þið sáuð allar vörslurnar hans David de Gea í þessum leik," sagði David Moyes við BBC Radio 5.

Marouane Fellaini skoraði sigurmarkið með skalla á 57. mínútu og hann fékk þá tíma í teignum eftir hornspyrnu Leighton Baines.

„Marouane Fellaini er góður hvar sem hann spilar á vellinum. Ég held að það hafi breytt miklu í kvöld að Manchester United var ekki með alla miðverði sína leikfæra. Hann skoraði markið sitt úr föstu leikatriði og það verður nóg af slíkum mörkum í ensku úrvalsdeildinni í vetur," sagði David Moyes.