Átrúnaðargoð blómakynslóðarinnar fallið frá

Bandaríski söngvarinn og hippinn Scott McKenzie lést í dag, 73 ára að aldri. Hann er þekktastur fyrir flutning sinn á laginu San Francisco (Be Sure to Wear Flowers in Your Hair) en það sló í gegn árið 1967.

Á heimasíðu McKenzies kemur fram að söngvarinn hafi þjáðst af Guillain-Barré heilkenninu en það er afar sjaldgæf sjálfsónæmisröskum sem hefur áhrif á taugakerfið.

Smellurinn San Francisco var saminn af tónlistarmanninum John Phillips en hann gerði garðinn frægan með hljómsveitinni The Mamas and the Papas á sjöunda áratugnum.

En það var flutningur McKenzies sem vakti hrifningu blómakynslóðarinnar.

Hægt er að sjá Scott McKenzie flytja lagið hér fyrir ofan.