Versta byrjun Liverpool í 75 ár

Liverpool steinlá 3-0 á útivelli gegn West Brom í 1. umferð ensku úrvalsdeildarinnar sem hófst í dag. Daniel Agger fékk rauða spjaldið hjá gestunum í síðari hálfleik.

Brendan Rodgers stýrði liði Liverpool í fyrsta skipti í dag og litu gestirnir ágætlega út í jöfnum fyrri hálfleik. Luis Suarez fékk fínt færi eftir hálftíma leik en skalli hans af stuttu færi fór yfir markið.

Á 43. mínútu komust heimamenn yfir. Zoltan Gera fékk þá boltann utan teigs. Ungverjinn tók boltann á brjóstkassann, leyfði honum að skoppa einu sinni áður en hann hamraði boltann efst í markhornið. Stórkostlegt mark og heimamenn kátir.

Eftir stundarfjórðungsleik í síðari hálfleik versnaði útlitið hjá Liverpool. Daniel Agger var þá vísað af velli fyrir að brjóta á Shane Long sem sloppinn var einn í gegn. Pepe Reina gaf gestunum þó von þegar hann varði afar slaka spyrnu Írans.

Jamie Carragher kom í kjölfarið inn á fyrir Stewart Downing sem heldur áfram að valda stuðningsmönnum Liverpool vonbrigðum. Gestirnir höfðu hins vegar varla náð að endurskipuleggja leik sinn þegar Phil Dowd, ágætur dómari leiksins, benti aftur á punktinn.

Í þetta skiptið gerði Martin Skrtel sig sekan um klaufaskap þegar Long stal boltanum af honum. Slóvakinn sparkaði óviljandi í Long sem féll og ekkert annað í stöðunni en að dæma víti.

Í þetta skiptið beið Long átektar á meðan Peter Odemwingie stillti boltanum upp. Nígeríumaðurinn hamraði boltann í vinstra hornið frá sér séð og staða heimamanna góð.

Belginn Romelu Lukaku kom inn á um miðjan síðari hálfleikinn hjá West Brom. Hann fór strax illa með Carragher og lagði upp dauðafæri fyrir James Morrison sem skaut framhjá. Belginn skoraði með skalla nokkrum mínútum síðar eftir sendingu Liam Ridgewell. Fyrsta mark Lukaku fyrir West Brom en framherjinn er í láni frá Chelsea.

Steve Clarke, stjóri West Brom, gat fagnað sætum sigri en Skotinn var í þjálfarateymi Liverpool á síðustu leiktíð er landi hans Kenny Dalglish réð gangi mála.

Ljósu punktarnir hjá gestunum var frammistaða Luis Suarez sem skapaði sér færi án þess að nýta þau. Þá leit Joe Allen vel út í rauða búningnum og greinilega mikill styrkur fyrir Liverpool.

Tap Liverpool er versta tap félagsins í efstu deild síðan árið 1937 er liðið lá 6-1 á útivelli gegn Chelsea.