Nafni Higgs-bóseindarinnar sækir fund eðlisfræðinga

Rannsóknarniðurstöður alþjóðlegs hóps kjarneðlisfræðinga verða kynntar á miðvikudaginn. Síðustu ár hefur hópurinn leitað að Higgs-bóseindinni dularfullu. Takist þeim að færa sönnur á tilurð eindarinnar myndi það marka tímamót í vísindasögu mannkyns.

Boðað var til fundarins fyrir nokkrum vikum. Síðan þá hefur orðrómur gengið um vísindasamfélagið að Higgs-bóseindin - hins svokallaða Guðseind - hafi loks fundist.

Í dag greindu bandarískir eðlisfræðingar frá því að traustar vísbendingar um tilvist eindarinnar hefðu fundist í sterkeindahraðli Fermilab rannsóknarstofnunarinnar. Vísindamennirnir sögðu þó að þeir þyrftu bera rannsóknargögn sín saman við niðurstöður kjarneðlisfræðinganna hjá CERN.

Þá var einnig greint frá því að Peter Higgs, prófessor emeritus við háskólann í Edinborg og sá sem fyrst gat sér til um tilvist Higgs-bóseindarinnar, verði viðstaddur þegar niðurstöður vísindamannanna verða kynntar.

Higgs-bóseindin er eini hluti staðallíkans eðlisfræðinnar sem ekki hefur fundist og er því að mörgu leyti týndi hlekkurinn í fræðilegri eðlisfræði. Þessi torkennilega eind er talin útskýra af hverju aðrar eindir, og þar með allt efni alheimsins, hefur massa.

Þannig er hún talin vera til grundvallar uppbyggingu alheimsins og því hafa fræðimenn gefið henni gælunafnið Guðseind.