Kosningar í Myanmar í dag

Aung San Suu Kyi, leiðtogi stjórnarandstöðunnar í Myanmar, sem hét áður Burma, er í framboði til þingsins í landinu í aukakosningum sem þar fara fram í dag. Kosið verður um fulltrúa í 45 þingsæti og hafa erlendir fjölmiðlar fengið meiri aðgang að landinu en nokkru sinni fyrr til að fylgjast með kosningunum.

Á fréttavef BBC segir að kosningin hafi fram að þessu farið friðsamlega fram. Stjórnvöld í Myanmar hafa frá árinu 2010 smám saman slakað á harðstjórnartaumunum, stór hluti pólitískra fanga hefur verið sleppt úr fangelsi, slakað hefur verið á höftum fjölmiðla og stjórnarandstöðuflokkur Aung Saan Suu Kyi hefur fengið að taka þátt í hinu pólitíska ferli.

Rúmir tveir áratugir eru síðan flokkur hennar tók síðast formlegan þátt í stjórnmálalífi landsins, en þá, árið 1990, vann flokkurinn þingkosningar í landinu með yfirburðum. Herinn neitaði hins vegar að viðurkenna úrslitin. Síðan hefur Suu Kyi verið að mestu innilokuð í stofufangelsi. Sautján stjórnarandstöðuflokkar taka þátt í kosningunum í Myanmar í dag.