Norðmenn segja upp samningum við Færeyjar vegna makrílsdeilu

Vefsíðan fishupdate greinir frá því að Norðmenn ætli að segja upp öllum tvíhliða fiskveiðisamningum sínum við Færeyjar vegna makríldeilunnar. Í frétt um málið er sagt áhugavert að sjá hvort Norðmenn leiki sama leikinn við Íslendinga.

Það mun ekki gerast að mati Friðrik Arngrímssonar framkvæmdastjóra LÍÚ. Friðrik segir í samtali við Fréttastofu að hann hafi ekkert heyrt um slíkar fyrirætlanir Norðmann né eigi von á að heyra slíkt. Uppsögn á þessum samningum væri sennilega þyngri baggi fyrir Norðmenn en Íslendinga.

Nokkrir tvíhliðasamningar eru í gildi milli Íslands og Noregs um veiðar innan lögsögu ríkjanna. Má þar nefna veiðar úr norsk-íslenska síldarstofninum og Smuguveiðarnar. Hvað Smugusamningnum viðkemur fá Íslendingar dágóðan þorskafla þar á móti því að Norðmenn fá að veiða stóran hluta af loðnukvóta sínum innan íslensku lögsögunnar ásamt smávægilegum heimildum í löngu og keilu. Raunar er loðnudæmið í þeim samning þríhliða því Grænlendingar eiga þar einnig hlut að máli.

Friðrik segir að ef Norðmenn ætluðu sér að segja upp þessum samningum myndi það væntanlega þýða óheftar veiðar Íslendinga í Smugunni.