"Ísrael elskar Íran" - ungmenni nota Facebook til að stilla til friðar

Á meðan diplómatar og blaðamenn rýna í orðræður stjórnarmanna í Ísrael, Íran og Bandaríkjunum og leita jafnframt eftir vísbendingum um mögulegar hernaðaraðgerðir gegn kjarnorkurannsóknarstöðvum í Íran, þá hafa nokkur ísraelks ungmenni tekið höndum saman og hrundið af stað herferð á samskiptasíðum. Allt er þetta gert í þeirri von um að koma í veg fyrir stríð milli landanna.

Herferðin er einfaldlega kölluð „Ísrael elskar Íran." Hún hófst á samskiptasíðunni Facebook og hefur í kjölfarið vakið mikla athygli. Þar var grafíski hönnuðurinn Ronny Edry sem skipulagði herferðina ásamt eiginkonu sinni, Michal Tamirm.

„Það gefur auga leið að Ísraelar og Íranir verða að óttast hvor aðra ef átök eiga að brjótast út," sagði Edry í viðtali við fréttastofuna ABC. Hann birti nýlega myndband á heimasíðu herferðarinnar þar sem hann segist hreint ekki óttast Írani. „Ég hata ykkur ekki. Ég þekki ykkur ekki. Íranir hafa aldrei gert neitt á minn hlut. Ég hef ekki einu sinni Írana - nema einu sinni reyndar - það var í skemmtigarði í París... fínasti gaur."

Á Facebook-síðu herferðarinnar er urmull ljósmynda af Ísraelum sem halda á skilti sem á stendur: „Íranir, við elskum ykkur." Undirfyrirsögn ljósmyndanna er: „Við munum aldrei varpa sprengjum á ykkur."

Eins og áður segir hefur herferðin vakið mikla athygli - bæði í Ísrael sem og Íran. Hún hefur fengið tæplega 40.000 „like" á Facebook. Þá hafa safnast rúmlega 16.000 dollarar. Edry og Tamirm ætla að nota peninginn til að prenta plaköt og skilti.

Ein vinsælasta myndin á Facebook-síðu herferðarinnar sýnir ungt par í faðmlögum. Þau kyssast innilega. Pilturinn heldur á ísraelsku vegabréfi á meðan stúlkan veifar stolt sínu íranska.

„Íranskar stelpur eru kynþokkafullar," skrifar kærastinn við myndina. „Þó svo að við komum frá mismunandi málsvæðum þá hefur menningararfurinn aldrei staðið í vegi fyrir ástinni. Löndin deila sömu gildum hvort eð er - þess vegna gengur þetta upp."

Hægt er að nálgast herferðina á Facebook hér.