Konungsslanga í klósettskálinni

New York-búinn Allen Shepard varð fyrir miður skemmtilegri lífsreynslu þegar 1.3 metra löng slanga skreið upp úr klósettinu hans.

Shepard var að bursta í sér tennurnar þegar hann sá eitthvað hreyfast í klósettskálinni. Hann færði sig nær og leit ofan í skálina. Kaliforníu konungsslanga horfði til baka.

„Ég hljóp út úr baðherberginu," sagði Shepard í viðtali við SI Live. „Ég lokaði hurðinni og náði í kúst. Ég leit inn og sá að slangan var að mjaka sér upp úr klósettskálinni og virtist ætla að ráðast á mig."

Slangan réðst á kústinn og vildi ekki sleppa.

Shephard kallaði á húsvörðinn sem síðan hafði samband við meindýraeyðinn Kenneth Rosenthal.

„Ég greip í slönguna og hélt henni niðri," sagði Rosenthal. „Síðan togaði ég í hana. Hún virtist aldrei ætla að enda."

Kaliforníu konungsslangan er ekki eitruð. Hún á þó til með að vera árásargjörn. Talið er að hún hafi verið gæludýr einhvers í blokkinni hans Shepards.