Fordæma aftökur í Hvíta Rússlandi

Leiðtogar Evrópusambandsins hafa fordæmt ákvörðun stjórnvalda í Hvíta Rússlandi þess efnis að taka af lífi tvo menn sem sakfelldir voru fyrir mannskæðar sprengjuárásir í neðanjarðarlestarstöð í höfuðborginni Minsk í fyrra.

Aftökurnar fóru fram á föstudaginn var og ákvað forseti landsins Alexander Lukashenko að afturkalla ekki dauðadómana, þrátt fyrir áköll þess efnis frá mannréttindasamtökum og Evrópuráðinu.

Efasemdir eru um að mennirnir sem um ræðir hafi í raun verið sekir, og hafa yfirvöld verið ásökuð um að beita þá harðræði við yfirheyrslurnar, en þeir játuðu báðir, þótt annar þeirra hafi síðar dregið játningu sína til baka.