Gandálfur kemur Hobbitanum til bjargar

Kvikmyndafyrirtæki í Hollywood og lítil krá í Bretlandi eiga í harðvítugri deilu um notkun á persónum úr hugmyndaheimi J.R.R. Tolkiens, höfundi Hringadróttinssögu og The Hobbit.

Eigendur barsins, sem einfaldlega heitir „The Hobbit," eru sakaðir um að hafa brotið á höfundarrétti kvikmyndafyrirtækisins Saul Zaentz Company.

Fyrirtækið hefur einkarétt á vörum tengdum Hringadróttinssögu og The Hobbit eftir Tolkien.

Zaentz segir að honum sé skilt að takast á við brot á höfundarrétti tengdum Tolkien. „Stærð fyrirtækisins skiptir engu máli," sagði Zaentz. Hann sagði að fyrirtæki sitt yrði að setja fordæmi til að koma í veg fyrir önnur tilfelli höfundarréttarbrota.

The Hobbit er staðsettur í Southampton í Bretlandi. Útlit barsins er innblásið af skáldverkum Tolkiens og eru styttur og ljósmyndir af persónum sagnanna víða á veggjum.

„Þegar fyrirtækið er rótgróið er nauðsynlegt að það viðurkenni brotið," sagði Zaentz. „Þá getur það greitt árlegt gjald fyrir notkun á vörumerkjunum - 100 pund á ári."

Rekstur hófst á Hobbitanum fyrir rúmum 20 árum. Helstu viðskiptavinir barsins eru stúdentar og ungir námsmenn í leit að ævintýrum.

En á þessum myrku tímum í ríki Hobbitans hefur hjálp borist úr allra ólíklegustu átt. Gandálfur sjálfur, Sir Ian McKellan, hefur lýst yfir stuðningi við Hobbitann ásamt leikaranum Stephen Fry en hann er nú við tökur á The Hobbit á Nýja-Sjálandi. Þeir segja báðir að baráttan sé ójöfn og að kvikmyndafyrirtækið ætti að endurskoða málið.

„Ég hef ekki farið á Hobbitann," sagði McKellan. „En það er augljóst að þetta er ekki staður þar sem illa á að fara með hobbita, álfa, dverga og seiðkarla."

Fastagestir Hobbitans hafa stofnað stuðningshóp á samskiptasíðunni Facebook. Rúmlega 45.000 manns hafa lýst yfir stuðningi sínum við barinn.

Hægt er að nálgast síðuna hér.