Martröð í uppsiglingu fyrir ráðamenn Repúblikanaflokksins

Versta martröð ráðamanna í Repúblikanaflokknum bandaríska er í uppsiglingu, það er flokksþing fyrir forsetakosningar þar sem enginn hefur meirihluta fulltrúa sem forsetaefni flokksins.

Það hefur lengi verið heilagur sannleikur innanbúðar í Repúblikanaflokknum að Mitt Romney væri eini maðurinn sem ætti möguleika á að sigra Barack Obama í komandi forsetakosningum í haust. Aðrir frambjóðendur séu of langt til hægri til að eiga hljómgrunn meðal þorra þjóðarinnar.

Rick Santorum hefur sett verulegt strik í þennan reikning. Ekki bara mælist hann með meira fylgi á landsvísu en Romney heldur á hann einnig góða möguleika á að sigra Romney í prófkjörinu í Michigan í næstu viku en Michigan er heimaríki Romney. Santorum er öfgafullur bókstarfstrúarmaður sem segir að Obama lesi ekki sömu biblíu og hann sjálfur.

Fjölmiðlar í Bandaríkjunum greina frá því að ráðamenn í Repúblikanaflokknum séu í örvæntingu sinni að bera víurnar í m.a. Jeb Bush ríkisstjóra Flórída að gefa kost á sér á flokksþinginu og þar með skapa enn eitt ættarveldið í bandarískum stjórnmálum.