Samkomulag um neyðarlán til Grikkja eftir langan fund

Fjármálaráðherrar evrusvæðisins náðu loks samkomulagi um nýtt neyðarlán til Grikklands í nótt. Þá hafði fundur ráðherranna staðið í um 13 klukkutíma í Brussel.

Samkomulagið sem kemur í veg fyrir gjaldþrot Grikklands í næsta mánuði felur í sér að landið fær 130 milljarða evra í nýjum lánum frá Evrópusambandinu og Alþjóðagjaldeyrissjóðnum og kröfuhafar munu afskrifa um 100 milljarða evra af opinberum skuldum Grikklands.

Þessu samkomulagi fylgja mjög ströng skilyrði um eftirlit með fjármálum hins opinbera í Grikklandi. Evran hefur hækkað nokkuð gagnvart dollara í morgun eftir að niðurstaðan lá ljós fyrir.