Wikileaks birtir gögn frá Stratfor

Uppljóstrunarsíðan Wikileaks hefur hafið birtingu á rúmlega fimm milljón tölvuskeytum frá bandaríska öryggisfyrirtækinu Stratfor. Mikil leynd hvílir yfir fyrirtækinu og eru gögnin sögð varpa ljósi á starfshætti fyrirtækisins.

Stratfor er einkarekið fyrirtæki sem veitir viðskiptavinum sínum sérsniðna öryggisþjónustu með því að safna leynilegum upplýsingum. Í tölvuskeytunum sem Wikileaks birti í dag eru nokkrir af viðskiptavinum Stratfor opinberaðir. Þar á meðal eru vopnaframleiðandinn Lockheed Martin og bandaríska leyniþjónustan CIA.

Í yfirlýsingu frá Stratfor er Wikileaks sakað um ógnir og tilraunir til að þagga niður í fyrirtækinu. Þá er Wikileaks sakað um að hafa falsað tölvuskeytin.

Í janúar á þessu ári réðust tölvuþrjótasamtökin Anonymous á Stratfor og stálu tölvuskeytum frá viðskiptavinum fyrirtækisins.