Ekki færri gift sig í þrjátíu ár

Giftingum í Danmörku fækkaði um tólf prósent frá árinu 2010 til 2011. 27.200 pör giftu sig í fyrra og hafa ekki verið færri frá árinu 1983. Þetta kemur fram í nýjum tölum frá hagstofu Danmerkur.

Giftingum hefur fækkað mikið frá árinu 2008. Sérfræðingar telja að fjármálakreppan hafi haft áhrif á fækkun giftinga. Auk þess er talið að fólk sem á foreldra sem hafa skilið að skiptum sé ólíklegra til að vilja gifta sig. Talið er að hjónabönd samkynhneigðra muni snúa þessari þróun við, en samkynhneigðir fá að gifta sig í landinu frá og með júní á þessu ári.

Einnig kemur fram í tölum hagstofunnar að fjöldi skilnaða sé nánast óbreyttur milli ára, rúm 40 prósent.

Vinsælasti giftingardagurinn í Danmörku í fyrra var ellefti nóvember, 11. 11. 2011. Þá voru 1.072 pör gift. Nýjar tölur sýna einnig að fæðingar voru færri í fyrra en í meðalári. Rúmlega 59.500 börn fæddust, og hafa ekki færri börn fæðst í Danmörku síðan árið 1988. - þeb