Ekki allir Bretar ánægðir með Ólympíuleikana

Það eru ekki allir Bretar ánægðir með að Olympíuleikarnir séu haldnir í London í sumar og finnst ýmislegt í tengslum við þá undarlegt.

Þetta kemur fram í viðamikilli úttekt á BBC undir fyrirsögninni Tíu atriði sem sumt fólk mun óttast við Ólympíuleikana. Þar er rætt um atriði eins og stóraukna bílaumferð í borg sem þekkt er fyrir að höndla illa slíka umferð. Sérmerktar akstursleiðir fyrir keppendur og heiðursgesti á nokkrum aðalbrautum í borginni munu ekki bæta Þetta vandamál.

Þá þykir furða að McDonalds er með einkaleyfi til matsölu í Ólympíugarðinum. Fyrir þjóð sem glímir við alvarlegt offituvandamál er kannski ekki rétta lausnin að hamborgarkeðja sjái um veitingarnar. Og ef þú ætlar að kaupa vatn á sömu slóðum er eingöngu hægt kaupa vatn sem Coca Cola hefur framleitt.

Einnig þykir Bretum nokkuð undarlegt að ekki hefur mikið verið talað um framtíðarafnot Ólympíumannvirkjanna. Utan þess að Ólympíuþorpið, þar sem keppendur búa, hefur verið selt til olíusjóðs Katar.