Sextán íslensk mörk í Evrópuboltanum

Þetta var flott helgi fyrir íslenska knattspyrnumenn og -konur í Evrópu því tólf þeirra voru á skotskónum með liðum sínum og skoruðu saman sextán mörk. Landsliðsþjálfarinn Lars Lagerbäck fylgdist væntanlega vel með gangi mála og það verður samkeppni um landsliðsstöðurnar fyrir næstu verkefni.

Það má heldur ekki gleyma því að Kolbeinn Sigþórsson er meiddur og Aron Jóhannsson, markahæsti leikmaður dönsku deildarinnar, gat heldur ekki spilað með AGF um helgina. Kolbeinn skoraði í eina leik sínum með Ajax á tímabilinu og Aron er búinn að skora 12 mörk í 13 leikjum í dönsku deildinni.

Sextán mörk á tímabilinuGunnar Heiðar Þorvaldsson skorað þrennu þegar Norrköping vann 4-0 útisigur á Sundsvall. Hann er nú kominn með 16 mörk í 27 deildarleikjum á tímabilinu og er annar markahæsti maður sænsku úrvalsdeildarinnar.

Ganamaðurinn Abdul Waris er markahæstur og það eru ekki miklar líkur á því að Gunnar Heiðar nái því að vinna upp sex marka forskot hans í síðustu tveimur umferðunum þrátt fyrir að okkar maður sé búinn að skora 7 mörk í síðustu 5 leikjum.

Alfreð Finnbogason skoraði tvö mörk og átti eina stoðsendingu þegar Heerenveen tapaði 3-6 á móti Heracles. Alfreð hefur skorað átta mörk í átta fyrstu deildarleikjum sínum með Heerenveen-liðinu og alls tólf mörk í níu leikjum í öllum keppnum í hollenska boltanum.

Jóhann Berg Guðmundsson var hetja AZ Alkmaar þegar hann skoraði sigurmark liðsins tveimur mínútum fyrir leikslok í 2-1 útisigri á Vitesse. Þetta var fyrsta mark hans á tímabilinu.

Steinþór Freyr Þorsteinsson átti frábæran leik þegar Sandnes Ulf vann 5-1 sigur á Fredrikstad í norsku úrvalsdeildinni. Steinþór skoraði fimmta og síðasta mark síns liðs en hafði áður gefið tvær stoðsendingar og fiskað tvö víti sem gáfu mörk. Hann kom því að öllum fimm mörkum liðsins og hefur alls átt þátt í 13 af 16 mörkum Sandnes-liðsins í síðustu níu leikjum.

Eiður Smári Guðjohnsen skoraði mark Cercle Brugge í 1-2 tapi á móti Standard Liège á föstudagskvöldið en Eiður Smári hefur skorað í þremur fyrstu leikjum sínum með Cercle.

Öflugir varamennAron Einar Gunnarsson kom inn á sem varamaður hjá Cardiff City og skoraði síðasta mark liðsins í 4-0 sigri á Burnley en aðeins fjórum dögum áður hafði hann tryggt liðinu 2-1 sigur á Watford í uppbótartíma nokkrum mínútum eftir að honum var skipt inn á.

Eyjólfur Héðinsson var hetja sinna manna í SönderjyskE þegar hann skoraði sigurmark í uppbótartíma þegar liðið vann 2-1 útisigur á Esbjerg. Eyjólfur kom inn á sem varamaður 20 mínútum fyrr en hann var þarna að leika sinn fyrsta leik síðan í ágúst.

Hannes Þ. Sigurðsson tryggði Atyrau 1-1 jafntefli á móti Ordasaby á útivelli í lokaumferðinni í deildinni í Kasakstan.

Þá má ekki gleyma Stefáni Gíslasyni sem setti punktinn yfir i-ið þegar Oud-Heverlee Leuven vann 3-1 útisigur á Beerschot. OH Leuven er nú búið að vinna fjóra leiki í röð með markatölunni 16-4 og Stefán hefur skorað tvö mörk og lagt upp eitt í þessari sigurgöngu.

Stelpurnar skoruðu líkaStelpurnar voru líka á skotskónum því landsliðskonurnar Margrét Lára Viðarsdóttir hjá Kristianstad og Katrín Jónsdóttir hjá Djurgården skoruðu báðar í markaleik milli sinna liða í sænsku kvennadeildinni og Margrét Lára lagði einnig upp mark til viðbótar. Margrét Lára hefur nú skorað í sex af síðustu átta leikjum sínum með Kristianstad og íslenska landsliðinu en Katrín var að skora sitt fyrsta mark í sænsku deildinni.

Kristín Ýr Bjarnadóttir kórónaði frábært tímabil í norsku b-deildinni með því að skora tvö mörk í 2-1 sigri í lokaumferðinni. Kristín Ýr skoraði alls 24 mörk í 22 leikjum á tímabilinu en Hólmfríður Magnúsdóttir gat ekki spilað vegna meiðsla en hún var markahæst í deildinni með 25 mörk. ooj@frettabladid.is