Ódæðið í Afganistan: Skaut níu börn og þrjár konur

Voðaverkin í Afganistan í dag eru olía á eld þar í landi en forseti Afganista, Hamid Karzai, krefst skýringar á morðunum og segir athæfið einfaldlega ófyrirgefanlegt.

Bandarískur hermaður skaut sextán saklausa borgara til bana í suðurhluta Afganistan snemma í morgun. Samkvæmt AP fréttastofunni myrti hermaðurinn níu börn og þrjár konur að minnsta kosti. Hann gekk á milli húsa og skaut íbúanna, að því er virðist með köldu blóði.

Morðin koma á versta tíma fyrir bandaríska herinn en stutt er síðan Kóraninn var brenndur á herstöð í Afganistan sem leiddi af sér blóðug mótmæli þar sem minnsta kosti 30 fórust.

Karzai var harðorður í yfirlýsingu sem hann sendi frá sér í dag. Þar sagði hann að þessi morð, þessi aftaka, væri ófyrirgefanleg. Bandaríkin hafa haft hersetu í Afganistan í áratug. Stefnt er að herinn snúi aftur til Bandaríkjanna árið 2014.

Sérfræðingar segja ódæðið þungt högg fyrir bandaríska herinn. Allur árangur sem hefur náðst í samskiptum hersins við landið eftir að kóraninn var brenndur er nú horfinn. Óvissa blasir við og hefur herinn stóraukið viðbúnaðarstig sitt og ráðlagt öllum erlendum ríkisborgurum að ferðast ekki um landið á eigin vegum.

Fimm manns særðust í árásinni og komust af. Þar á meðal var fimmtán ára gamall drengur sem heitir Rafiullah. Hann talaði við Karzai í síma og lýsti því fyrir honum hvernig bandaríski hermaðurinn fór inn á heimili fjölskyldu hans um nóttina, vakti íbúana og byrjaði að skjóta þau hvert af öðru. Sjálfur var pilturinn skotinn í fótinn.

Bandaríski herinn reynir nú að sannfæra almenning um að þarna hafi verið einangrað tilvik að ræða þar sem vitstola hermaður hafi gengið um og myrt almenna borgara. Sumir Afganir standa í þeirri trú að fleiri hermenn hafi verið að verki, og hugsanlega framið ódæðið með samþykki hersins.

Hvernig sem á það er litið, þá má búast við hörðum viðbrögðum almennings vegna ódæðisins.