Manchester United lenti 2-0 undir en vann 3-2 sigur á Blackpool

Dimitar Berbatov skoraði tvö mörk og súper-varmaðurinn Javier Hernandez það þriðja þegar Manchester United kom til baka eftir að hafa lent 2-0 undir á móti Blackpool og vann 3-2 sigur á Bloomfield Road í ensku úrvalsdeildinni í kvöld.

Manchester United náði þar með fimm stiga forskoti á toppnum og hefur enn ekki tapað í ensku úrvalsdeildinni á tímabilinu.

Blackpool átti fyllilega skilið að vera 2-0 yfir í hálfleik en það má aldrei afskrifa Englandsmeistara Manchester United eins og sást í síðari hálfleiknum.

Charlie Adam sýndi afhverju Liverpool hefur svona mikinn áhuga á honum því hann átti frábæran leik á miðju Blackpool og bæði mörk liðsins komu eftir frábærar hornspyrnur frá honum.

Craig Cathcart kom Blackpool í 1-0 á 15. mínútu þegar hann kom á fleygiferð og skallaði inn hornspyrnu frá Charlie Adam. Þetta var fyrsta alvöru sókn heimamanna í leiknum.

DJ Campbell kom Blackpool síðan í 2-0 tveimur mínútum fyrir hálfleik þegar hann skallaði boltann inn af markteig eftir hornspyrnu frá Charlie Adam.

Það tók Manchester United 72 mínútur að opna markareikninginn sinn þegar Dimitar Berbatov skoraði eftir fyrirgjöf Darren Fletcher.

Javier Hernández hafði komið inn á sem varamaður fyrir Wayne Rooney á 66. mínútu og hann jafnaði leikinn á 74. mínútu eftir stungusendingu frá Ryan Giggs.

Berbatov skoraði síðan sigurmarkið á 87. mínútu eftir sendingu frá Paul Scholes en þetta var tuttugasta markið hans á tímabilinu.

Rafael da Silva meiddist illa á lokakaflanum og það var mikil töf á leiknum enda var uppbótartími upp á tíu mínútur.