Holloway fékk sekt fyrir að gera 10 breytingar á byrjunarliðinu

Stjórn ensku úrvalsdeildarinnar komst að þeirri niðurstöðu í dag að sekta úrvalsdeildarliðið Blackpool um tæplega 5 milljónir kr. fyrir þá ákvörðun Ian Holloway knattspyrnustjóra liðsins að gera 10 breytingar á byrjunarliðinu fyrir leik gegn Aston Villa í nóvember s.l.

Holloway leyndi því ekki á þeim tíma að hann ætlaði sér að hvíla leikmenn fyrir næsta leik og forráðamenn ensku úrvalsdeildarinnar voru ekki ánægðir með ákvörðun knattspyrnustjórans.

Holloway sagði í nóvember að hann myndi hætta sem knattspyrnustjóri liðsins ef enska úrvalsdeildin myndi sekta félagið fyrir breytingarnar sem hann gerði á byrjunarliðinu.

Samkvæmt úrskurði ensku úrvalsdeildarinnar braut Blackpool reglur B.13 og E.20 í leiknum gegn Aston Villa þann 10. nóvember s.l. Þetta er ekki í fyrsta sinn sem enska úrvalsdeildin gerir slíkt því Wolves fékk sömu meðferð í fyrra fyrir svipað atvik.

Leikurinn gegn Aston Villa var ekki sá eini sem enska úrvalsdeildin tók til skoðunar. Holloway gerði alls 9 breytingar á byrjunarliðinu fyrir bikarleik gegn Southampton í þriðju umferð keppninnar. Það gerði hann til þess að hvíla leikmenn fyrir úrvalsdeildarleik gegn Liverpool.