Didier Drogba, framherji Chelsea, segir að tapið á móti Liverpool verði liðinu mjög dýrkeypt í titilbaráttunni í ensku úrvalsdeildinni og að allt Chelsea-liðið sé í raun í sárum eftir leikinn.

„Þetta slæma gengi er mjög erfitt fyrir mig og ég er ekki sá eini í liðinu sem á erfitt með sig. Allt liðið er í þunglyndi yfir þessu gengi okkar því það má ekki líta framhjá því að enginn hjá Chelsea er vanur að tapa svona mörgum leikjum," sagði Didier Drogba.

„Carlo Ancelotti er ekki búinn að vera ánægður með okkur undanfarnar vikur og öll meiðslin, slæmu úrslitin og fá skoruð mörk, hafa skapað slæmt ástand innan liðsins," sagði Drogba.

„Ég sjálfur hef ekki getað skilað nóg til liðsins vegna allra meiðslanna og malaríu-sýkingarinnar sem ég varð fyrir í lok síðasta árs," sagði Drogba.

„Við vorum búnir að vinna þrjá leiki í röð fyrir Liverpool-leikinn, á móti

Blackburn, Bolton og Sunderland, og við vorum farnir að sjá ljós við enda ganganna. Tapið á móti Liverpool hefur kippt undan okkur löppunum og verulega skaðað möguleika okkar á að vinna titilinn. Það verður erfitt að ná Manchester United úr þessu," sagði Drogba sem lýst samt vel á samstarfið við Fernando Torres.

„Fernando er svo hæfileikaríkur leikmaður að hann mun verða mjög mikilvægur fyrir okkur. Það var erfitt fyrir hann andlega að spila sinn fyrsta leik á móti gömlu liðsfélögunum. Koma hans þýðir að það verðu mjög hörð samkeppni um sæti í liðinu og það er bara gott fyrir Chelsea-liðið enda hefur slík samkeppni hjálpað félaginu að vinna titla í gegnum tíðina," sagði Drogba í þessu viðtali við the Sun.