Guðlaugur á leið til Hibernian

Vefmiðillinn Fótbolti.net greinir frá því í dag að U-21 landsliðsmaðurinn Guðlaugur Victor Pálsson sé á leið til skoska úrvalsdeildarfélagsins Hibernian.

Guðlaugur Victor hefur verið á mála hjá Liverpool í rúm tvö ár en hann er nítján ára gamall. Hann lék áður með AGF í Danmörku og yngri flokkum Fylkis.

Hann var lánaður til Dagenham & Redbridge fyrr á tímabilinu en mun nú flytja sig um set til Edinborgar.

Guðlaugur Victor kom inn á sem varamaður í hálfleik þegar að Ísland vann 2-1 sigur á Skotum - einmitt á Easter Road, heimavelli Hibernian - og tryggði sér þar með sæti í úrslitakeppni EM í Danmörku næsta sumar.

Hann lék marga leiki með varaliði Liverpool og nokkra æfingaleiki með aðalliði félagsins.

Hibernian er í næstneðsta sæti skosku úrvalsdeildarinnar með sextán stig eftir 21 leik.

Félagi Guðlaugs í U-21 landsliðinu, Eggert Gunnþór Jónsson, leikur með Hearts sem einnig er staðsett í Edinborg.