Á von á sínu 20. barni - vildi ekki hætta í oddatölu

Móðir ein í Arkansas í Bandaríkjunum eignaðist í desember árið 2009 sitt nítjánda barn og hefur nú tilkynnt að hún og eiginmaðurinn eigi von á sínu tuttugasta barni.

Í samtali við NBC sjónvarpsstöðina segir móðirin að hún hafi ekki viljað hætta að eignast börn í oddatölu og því hafi það verið mikil hamingja á heimilinu þegar hún uppgötvaði að von væri á tuttugasta barninu á næstu mánuðum.

Hún segist vera í betra formi nú en fyrir tuttugu árum síðan en elsta barn hennar er 23 ára.

Og það sem meira er við þessa miklu frjósemi vestanhafs er að öll nöfnin á börnunum nítján byrja á bókstafnum joð. Gera má ráð fyrir að nýjasta afkvæmið beri líka bókstafinn góðan þegar það kemur í heiminn eftir áramót.