Ólafur Örn: Menn fara að kenna öðrum um en sjálfum sér

Ólafur Örn Bjarnason þjálfari Grindavíkur var afar ósáttur við spilamennsku sinna manna í kvöld. Hann sagði sína menn allt of gjafmilda við FH en Grindvíkingar lögðu upp tvö mörk Hafnfirðinga í leiknum.

„Við gerum okkur grein fyrir að við vorum að spila á móti góðu FH-liði. Mér fannst við eiga beinan þátt í að minnsta kosti fimm af mörkunum þeirra. Þar sem við erum að gera barnaleg mistök. Eftir það er leikurinn hálfónýtur. En slysin héldu áfram í seinni hálfleik. Við skorum tvö góð mörk og fáum tvö til þrjú góð færi, hefðum getað lagað þetta," sagði Ólafur Örn.

„Við spilum illa, vorum ekki duglegir, vorum ekki að reyna nógu mikið og vorum hver og einn að reyna að gera eitthvað. Það er ákveðin ábyrgðarflótti þegar þetta verður svona erfitt. Það er erfitt á móti góðu liði eins og FH. Þeir þurfa enga hjálp frá okkur til þess að vinna leikir. Þetta spilaðist einhvern veginn allt í mínus hjá okkur," sagði þjálfarinn.

Ólafur Örn segir að menn megi ekki fara að kenna öðrum um en sjálfum sér. Leikmenn þurfi að líta í eigin barm.

„Fyrst og fremst er þetta einbeitingarleysi. Þetta gerist oft hjá liðum í ströggli. Það verður ábyrgðarflótti og menn fara að kenna öllum öðru um en sjálfum sér. Það er það hættulegasta við þetta. Menn þurfa að byrja á að líta á sjálfan sig áður en menn fara að hugsa um samherjana."

Gengi Grindvíkinga hefur verið brösótt í sumar og menn velta því fyrir sér hvort honum finnist sæti hans sem þjálfara vera orðið heitt.

„Ég verð að viðurkenna að ég tel mig ekki þurfa að ræða það við einn né neinn. Það gerist bara í Grindavík þegar það gerist. Ég get ekkert verið að hugsa um það. Við þurfum bara að koma þessum leik úr hausnum og skrokknum á okkur. Það er mikilvægur leikur gegn Fram á mánudaginn. Öll svoleiðis vitleysa er bara eyðsla á orku og ég tel okkur þurfa á allri okkar orku að halda," sagði Ólafur að lokum.