Vermaelen í óvissu vegna meiðslanna

Belginn Thomas Vermaelen segist ekki vita hvenær hann muni ná sér góðum af meiðslum sínum en hann hefur ekki spilað með liði sínu, Arsenal, síðan í ágúst.

Vermaelen hefur verið að glíma við meiðsli í hásin en upphaflega var talið að hann yrði frá í aðeins sex vikur.

Hann gekkst svo undir aðgerð vegna meiðslanna í janúar síðastliðnum og stefndi á að spila aftur í mars.

„Ég veit ekki hvenær ég get byrjað að spila aftur,“ sagði hann í samtali við enska fjölmiðla í dag. „Það verður ekki í mars. Ég er ekki einu sinni byrjaður að æfa aftur. Þetta hefur verið erfitt fyrir mig.“