Stendur Warnock við orð sín og lætur Heiðar fá nýjan samning?

London Evening Standard skrifar um mál Heiðars Helgusonar í dag en Heiðar vill gera nýjan samning við Queens Park Rangers sem vann sér sæti í ensku úrvalsdeildinni fyrir næsta tímabil. Blaðið veltir því fyrir sér hvort stjórinn Neil Warnock standi við orð sín frá því í mars en þá sagði hann að Heiðar myndi fá nýjan samning.

Heiðar er orðinn 33 ára gamall en hann skoraði 13 mörk og gaf 8 stoðsendingar í 34 leikjum með QPR á þessu tímabili og átti mikinn þátt í því að Queens Park Rangers vann ensku b-deildina og spilar í fyrsta sinn í fimmtán ár í ensku úrvalsdeildinni.

„Ég er búinn að segja við Heiðar að hann fái nýjan samning. Hann veit að ég mun passa upp á hann og að hann hefur hlutverk hjá okkur á næsta tímabili," sagði Neil Warnock í mars.

„Ég hef ekki samning eins og staðan er núna en ég er vongóður um að fá samning. Það verða samt alltaf sögusagnir í gangi um leikmenn og stjóra hjá QPR," sagði Heiðar við London Evening Standard.