Tevez skildi ekki sektina frá lögreglunni

Carlos Tevez, framherji Man. City, hefur verið sektaður um rúmar 20 þúsund krónur fyrir brot á umferðarreglum. Tevez keyrði of hratt í nóvember síðastliðnum en var fyrst sektaður núna.

Það á sér reyndar sínar ástæður. Tevez segist ekki hafa getað greitt sektina því hann hafi ekki skilið bréfið sem hann fékk sent heim en Tevez er afar slakur í ensku þó svo hann hafi búið þar í nokkur ár.

Lögfræðingur Tevez sagði að hann hefði ekki brugðist við bréfinu sökum lélegrar enskukunnáttu. Framherjinn fékk einnig þrjá punkta.

Bíll Tevez var tekinn af honum árið 2009 er í ljós kom að hann var ekki með löglegt skírteini í Bretlandi.