Gervihnöttur á leið til jarðar - myndband

Myndband náðist af bandarískum gervihnettinum fyrir ofan Frakkland þegar hann brann upp í lofthjúpi jarðar um miðjan mánuðinn. Áætlað er að gervihnötturinn muni lenda á jörðinni  þann 24. september næstkomandi.

Hnötturinn er sex tonn að þyngd og var skotið út í geiminn árið 1991. Tilgangur hans var að fylgjast með ósonlagi jarðar og veðrabreytingum.

Vísindamenn hafa fylgst náið með falli gervihnattarins sem er að falla til jarðar mun fyrr en áætlanir gerðu ráð fyrir. Ekki er ljóst hvar hann mun lenda, en líklega verður það  á norðurhveli jarðar.

Ekki eru taldar miklar líkur á því að hnötturinn muni ógna lífi. Þannig hafa vísindamenn reiknað út að líkurnar eru einn á móti þrjú þúsund og tvö hundruð að hnötturinn lendi á byggð eða ógni líf með öðrum hætti. Það er þó meiri líkur en bandaríska geimferðastofnunin vildi sjá; eða einn á móti tíu þúsund.

Gervihnötturinn, sem heitir UARS, er einn stærsti gervihnöttur sem hefur fallið til jarðar. Sá stærsti féll til jarðar árið 1979 og var fimmtán sinnum þyngri.

Þess má geta að enginn hefur nokkurntímann slasast eða látið lífið af því að fá gervihnött í sig.

Hægt er að nálgast myndbandið hér.