Sonur Gaddafi mun berjast þar til yfir lýkur

Sonur Muammar Gaddafi, Seif al-Islam, hefur heitið því að berjast til dauða og krefst þess jafnframt að liðsmenn Gaddafi gefist ekki upp fyrir uppreisnarmönnum, sem nálgast nú síðasta vígi Gaddafi óðfluga.

Seif al-Islam kom fram á útvarpsupptöku á Al-Rai sjónvarpsstöðinni fyrr í dag og sagðist tala frá úthverfum Tripoli. Hann sagði föður sinn heilan á húfi. „Við munum deyja í landinu okkar. Enginn mun gefast upp," sagði hann.

Þessi yfirlýsing kemur rétt sólarhring eftir að annar sonur Gaddafi býðst til þess að gefast upp. Sá sonur, al-Saadi, sagði mikilvægt að binda enda á blóðbaðið og kvaðst tala í umboði föður síns. Yfirlýsingarnar tvær virðast gefa til kynna ákveðna togstreitu innan herbúða Gaddafi.

Á morgun verða nákvæmlega 42 ár síðan Muammar Gaddafi komst til valda með uppreisn.