Málaferli vegna dauðrar rottu

Þegar danska matvælaeftirlitið fékk tilkynningu frá fyrirtækinu Flex Pack, sem selur Nupo megrunarduftið, í apríl síðastliðnum um að fundist hefði dauð rotta í gámi með heslihnetum frá Tyrklandi ákvað eftirlitið að farminum, 24 tonnum, yrði eytt. Litið var svo á að hneturnar væru mengaðar af úrgangi frá rottum og þess vegna gætu þær verið heilsuspillandi. Þær væru ekki hæfar til neyslu.

Talsmenn fyrirtækisins Flex Pack kváðust ekki vera eigendur farmsins, sem var metinn á jafngildi rúmlega 17 milljóna íslenskra króna, þar sem gámurinn væri enn í fríhöfninni í Kaupmannahöfn. Um væri að ræða eins konar einskis manns land. Lögmaður fyrirtækisins taldi fyrirtækið hafa rétt til þess að skila hnetunum.

Seljandinn í Tyrklandi vildi fá hneturnar endursendar og krafðist bóta af Flex Pack léti það eyða þeim. Hann hefur höfðað mál gegn danska landbúnaðar- og matvælaráðuneytinu, að því er segir á vef 24 stunda í Danmörku. Þar er þess getið að Yildirim Yilmaz, forstjóri tyrkneska hnetufyrirtækisins Poyraz Poyraz, sé æfur. Hann vill fá hneturnar sínar aftur og kveðst vilja láta tyrkneska matvælaeftirlitið rannsaka farminn. Því er jafnframt lofað að hneturnar verði ekki aftur sendar til Evrópusambandsríkis.- ibs