Skekkjumörk upp á tugi milljóna manna

Á Filippseyjum ákváðu stjórnvöld að „eigna sér“ sjö milljarðasta barn jarðar, sem mannfjöldafræðingum reiknast til að hafi fæðst í fyrrinótt.

Lítil stúlka sem kom í heiminn tveim mínútum fyrir miðnætti á sjúkrahúsi í höfuðborginni Manila fékk veglegar móttökur. Embættismenn fluttu ræður, ljósmyndarar smelltu í gríð og erg og svo var súkkulaðikaka í boði. Móðirin, sem er af fátækri fjölskyldu, fékk gjafabréf upp á ókeypis skófatnað handa barninu.

Athöfnin var þó meira táknræn en að nokkrum hafi dottið í hug að fullyrða að nákvæmlega þetta barn hafi verið það sjö milljarðasta í röðinni. Satt að segja hefur Gerhard Heilig, sem sér um að gera áætlanir um mannfjöldaþróun fyrir Sameinuðu þjóðirnar, sagt það vera vitleysu að nokkur geti sagt til um hvar eða nákvæmlega hvenær sjö milljarðasta barnið fæðist.

Þótt 31. október hafi verið nefndur sé það með eins til tveggja prósenta skekkjumörkum, sem þýðir að sjöunda milljarðinum er náð einhvern tímann á bilinu frá aprílbyrjun í ár til marsloka á næsta ári. Skekkjumörkin þýða líka að nákvæmlega núna getur mannfjöldinn verið 56 milljónum meiri eða 56 milljónum minni en títtnefndir sjö milljarðar.

Engu að síður var efnt til sambærilegra athafna víðar um heim í gær. Í héraðinu Uttar Pradesh á Indlandi útnefndu yfirvöld til dæmis sjö nýfædd börn til að vera fulltrúar milljarðanna sjö.- gb