Skýrslan ótrúlega þunnur þrettándi

„Mér þykir þessi skýrsla nú ótrúlega þunnur þrettándi þegar kemur að varnar- og öryggismálum," segir Össur Skarphéðinsson utanríkisráðherra um skýrslu rannsóknarstofnunar sænska hersins um ástand öryggismála á Íslandi, sem Fréttablaðið sagði frá í gær. „Hins vegar gefur hún góða félags- og sálfræðilega sýn á þjóð í vanda að lokinni kreppu."

Össur segir til dæmis varla minnst í skýrslunni á varnarsamning Íslands og Bandaríkjanna frá 1951, sem enn er í fullu gildi, né heldur þá varnaráætlun sem gerð var fyrir Ísland árið 2006 þegar herinn fór.

Á septemberþinginu í haust var auk þess samþykkt þingsályktun um mótun þverpólitískrar þjóðaröryggisstefnu fyrir Ísland og í mars samþykkti þingið aðra ályktun um stefnu Íslands í málefnum norðurslóða.

„Þessi vinna er að fara af stað núna í vetur," segir Árni Þór Sigurðsson, formaður utanríkismálanefndar. „En menn skyldu þá líka athuga það að þegar herinn fór héðan þá var þetta mál ekki á dagskrá þáverandi ríkisstjórnar. Það hefur engin vinna verið lögð í þetta fyrr en núna, að við erum að gera það."

Sænsku sérfræðingarnir ýja einnig að því, í skýrslu sinni, að Ísland hafi verið að einangra sig í varnarsamstarfi nágrannaríkjanna með því til dæmis að taka minni þátt í sameiginlegum heræfingum en til stóð á tímabili.

„Um þetta er auðvitað pólitískur ágreiningur á Íslandi," segir Árni Þór. „Sjálfur er ég þeirrar skoðunar að slíkt þjóni bara alls ekki hagsmunum Íslands, þótt þessar heræfingar geti verið mikilvægar sem framlag Íslands til NATO."

- gb