Fer Lehmann í byrjunarliðið hjá Arsenal?

Bresku blöðin gera því skóna í dag að þýski markvörðurinn Jens Lehmann verði í byrjunarliðinu hjá Arsenal þegar liðið leikur næst í ensku úrvalsdeildinni.

Spánverjinn Manuel Almunia gerði skelfileg mistök í 2-2 jafntefli Arsenal gegn West Brom í gær og er talið að þolinmæði Arsene Wenger, knattspyrnustjóra Arsenal, sé á þrotum. Jens Lehman, sem hætti í knattspyrnu fyrir níu mánuðum, er því líklegur til að taka sæti hans í næsta leik er liðið mætir Blackburn Rovers á heimavelli þann 2. apríl.

Lehmann, sem er 41 árs gamall, kom til Arsenal vegna mikilla meiðsla meðal markvarða félagsins og gæti nú átt í vændum magnaða endurkomu í ensku úrvalsdeildina.

„Ég vil ekki fara út í gagnrýni á frammistöðu einstaklinga," sagði Wenger eftir leikinn. „Það sem var gott í okkar frammistöðu er að við börðumst. Það verður áhugavert að fylgjast með liðinu það sem eftir er af leiktíðinni því við erum mjög einbeittir og erum tilbúnir til að berjast."