Lukkan ekki í Arsenal-búningnum í vetur

Hvernig væri staðan í ensku deildinni ef öll stangarskotin hefðu farið í stöngina og inn í staðinn fyrir að fara í stöngina og út? Fyrirtækið Opta sér um alla tölfræðivinnslu í ensku úrvalsdeildinni og það hefur nú einmitt tekið saman þessa tölfræði úr fyrstu 35 umferðunum á leiktíðinni.

Arsenal-liðið er búið að missa af möguleikanum á því að vinna enska titilinn og stuðningsmenn geta vottað um það að lukkan hefur ekki verið með strákunum hans Arsene Wenger. Nú geta þeir líka rökstutt þessa kenningu sína með umræddri tölfræði frá Opta.

Opta skoðaði það hver staðan væri í deildinni ef öll stangarskot hefðu orðið mark. Arsenal-liðið hefur alls átt 21 stangarskot í deildinni og væri þá með 19 fleiri stig ef þessi skot hefðu skilað sér í markið. Í stað þess að vera sex stigum á eftir toppliði Manchester United væri Arsenal-liðið þess í stað með 12 stiga forskot á Chelsea og þrettán stigum meira en United.

Liverpool-menn myndu líka gleðjast ef stangarskotin þeirra hefðu farið inn því Liverpool sæti þá í Meistaradeildarsæti þar sem Manchester City hefur hagnast mikið á stangarskotum. City væri með sex stigum færra og þremur stigum á eftir Liverpool ef öll stangarskotin hefðu farið í markið í vetur.

West Ham er annað lið sem kemur vel út úr þessari tölfræði því í stað þess að vera á botninum eins og liðið er í dag væru Hamrarnir í 13. sæti, átta stigum frá fallsætinu. Newcastle sæti hins vegar í fallsætinu ásamt Birmingham og Blackpool.

Stöngin-inn deildin1. Arsenal 86 stig (+19, er í 3. sæti)

2. Chelsea 74 stig (+4, 2. sæti)

3. Man. United 73 stig (0, 1. sæti)

4. Liverpool 59 stig (+4, 5. sæti)

5. Man. City 56 stig (-6, 4. sæti)

6. Tottenham 56 stig (+1, 6. sæti)

7. Everton 47 stig (-1, 7. sæti)

8. Stoke 47 stig (+4, 10. sæti)

9. Aston Villa 45 stig (+4, 14. sæti)

10. Bolton 45 stig (-1, 8. sæti)

11. Fulham 42 stig (-3, 9. sæti)

12. West Brom 41 stig (-2, 11. sæti)

13. West Ham 41 sitg (+9, 20. sæti)

14. Sunderland 40 stig (-1, 13. sæti)

15. Blackburn 39 stig (+1, 16. sæti)

16. Wolves 34 stig (0, 19. sæti)

17. Wigan 34 stig (-1, 18. sæti)

18. Newcastle 33 stig (-8, 12. sæti)

19. Birmingham 33 stig (-6, 15. sæti)

20. Blackpool 30 stig (-5, 17. sæti)