Ásgeir Gunnar með FH næsta sumar

Knattspyrnudeild FH hefur gengið frá samningum við Ásgeir Gunnar Ásgeirsson sem mun áfram leika með liðinu næsta sumar.

Ásgeir Gunnar hefur leikið lengst af á sínum ferli með FH-ingum og er margfaldur Íslandsmeistari með liðinu. Hann hefur átt við meiðsli að stríða undanfarin tvö ár og kom aðeins við sögu í níu leikjum með liðinu síðastliðið sumar.

Hann mun nú vera í sérstakri þjálfun hjá FH-ingum og er ekki áætlað að hann byrji að æfa með félögum sínum fyrr en í mars næstkomandi.

Ásgeir Gunnar er þrítugur og á að baki 158 leiki í efstu deild og hefur skorað í þeim 22 mörk. Hann á einnig að baki þrjá A-landsleiki.