Wenger: United er heppið að vera enn taplaust

Arsene Wenger, stjóri Arsenal, er á því að Manchester United liðið sé búið að hafa heppnina með sér það sem af er tímabilsins en United er enn taplaus í ensku úrvalsdeildinni.

Manchester United á því enn möguleika á því að jafna afrek Arsene Wenger og lærisveina hans í Arsenal frá tímabilinu 2003-04 þegar liðið tapaði ekki deildarleik allt tímabilið.

„Ertu að spyrja mig um hvort United geti farið í gegnum tímabilið taplaust? Auðvitað geta þeir gert það því þeir hafa ekki tapað ennþá. Þeir hafa haft heppnina með sér hingað til en ég veit ekkert meira en þið hvernig þetta mun spilast," sagði Arsene Wenger á blaðamannafundi fyrir leik Arsenal á móti Wigan í dag.

„Maður byrjar ekki að hugsa um að vinna titilinn fyrr en það eru fimm leikir eftir af tímabilinu. Að vinna titilinn er ekki inn í myndinni þegar enn eru sextán leikir eftir af deildinni," sagði Wenger.

„United var heppið á móti West Brom til að nefna dæmi en ég er annars bara að einbeita mér af frammistöðu míns liðs. Það sem er mikilvægt fyrir okkur er að verða fyrir ofan United og til þess að það takist þá þurfum við að spila einstaklega vel út tímabilið," sagði Wenger.

„Þeir eiga erfiða leikjadagskrá framundan alveg eins og við. Talið við mig aftur þegar fimm umferðir eru eftir og ef United er enn taplaust þá get ég spáð því að þeir fari taplausir í gegnum tímabilið," sagði Wenger.