Svíar ósammála um brottvísun 91 árs konu

Yfirvöld í Svíþjóð frestuðu því á síðustu stundu í gær að senda 91 árs gamla úkraínska konu úr landi. Ákvörðunin var tekin eftir að Mannréttindadómstóll Evrópu ákvað að taka mál konunnar fyrir.

Mál konunnar hefur vakið athygli í Svíþjóð. Henni var neitað um landvistarleyfi í landinu, þar sem hún á afkomendur, og átti að vísa henni aftur til Úkraínu þar sem hún á enga ættingja lengur. Konan er með Alzheimer, er sjónskert og hjartveik. Vegna ástands hennar var ákvörðuninni um brottvísun mótmælt harðlega. Hún fær nú að dvelja í Svíþjóð þar til dómstóllinn hefur úrskurðað í málinu. -þeb