Mannát í hollenskum sjónvarpsþætti

Hollensku þáttastjórnendurnir Dennis Storm og Valerino Zeno ákváðu að bragða á holdi hvors annars. Hluti af kviði og rasskinn voru á boðstólunum.

Dennis sagði að það hefði verið ansi undarleg reynsla að horfa í augun á félaga sínum og japla um leið á kviði hans. Valerino sagði að rasskinn Dennis hefði bragðast undarlega.

Þeir Dennis og Valerino fengu að ráða hvaða líkamspartar yrðu á boðstólum. Þeir létu slátrara fjarlægja holdið og læknir gerði síðan að sárum þeirra. Næsta stopp var upptökuverið þar sem mannátið var fest á filmu.

Kjötið var eldað í stutta stund upp úr sólblómaolíu. Þeir ákváðu að krydda kjötið ekki - mannakjötið ætti að bragðast eins og mannakjöt.

Félagarnir stjórna hollenska sjónvarpsþættinum "Proefkonijnen" eða "Tilraunakanínur". Í þættinum leita vinirnir svara við spurningum sem fæstum dytti í hug að spyrja, til dæmis: Er hægt að aka bíl blindandi og er hægt að raka sig með tómatsósu.

Þátturinn verður sýndur á miðvikudaginn á sjónvarpsstöðinni BNN.