Ba í læknisskoðun hjá Stoke

Demba Ba mun í dag gangast undir læknisskoðun hjá enska úrvalsdeildarfélaginu Stoke eftir því sem fram kemur á fréttavef Sky Sports.

Stoke mun hafa boðið þýska úrvalsdarfélaginu Hoffenheim 5,9 milljónir punda í Ba sem er sóknarmaður.

Hann var orðaður við West Ham og Ba fór í verkfall hjá Hoffenheim eftir að salan gekk ekki í gegn. En nú virðist sem svo að Hoffenheim sé reiðubúið að selja Ba og mun það hafa gefið kappanum leyfi til að ræða við Stoke.

Ba er liðsfélagi Gylfa Þór Sigurðssonar en Eiður Smári Guðjohnsen er á mála hjá Stoke. Eiður hefur reyndar lítið sem ekkert fengið að spila með Stoke í haust og er sagður á leið frá félaginu.

Þá eru ágætar líkur taldar á því að Ba verði orðinn leikmaður Stoke áður en liðið mætir Bolton í ensku úrvalsdeildinni um helgina.