Arsenal í úrslit deildabikarsins

Arsenal komst í kvöld í úrslit ensku deildabikarkeppninnar eftir góðan 3-0 sigur á B-deildarliði Ipswich.

Fyrri leik liðanna lauk með 1-0 sigri Ipswich á heimavelli en í þetta sinn höfðu lærisveinar Arsene Wenger betur.

Ipswich náði þó lengi vel að halda aftur af Arsenal í leiknum og það var ekki fyrr en á 61. mínútu að Arsenal náði að skora. Nicklas Bendtner var þar að verki með glæsilegu skoti eftir sendingu Jack Wilshere.

Þremur mínútum síðar náði Laurent Koscielny að koma Arsenal í 2-0 með skallamarki eftir hornspyrnu áður en fyrirliðinn Cesc Fabregas innisglaði sigurinn með marki eftir undirbúning Andrey Arshavin.

Arsenal mætir annað hvort Birmingham eða West Ham í úrslitaleiknum en þessi lið mætast á morgun. West Ham vann fyrri leikinn á heimavelli, 2-1.