Óttast að leiðtogafundur ESB endi í klúðri

Embættismenn og evrópskir diplómatar óttast nú að neyðarfundur Evrópusambandsins sem haldinn verður í Brussel í dag endi í klúðri.

Fundurinn er framhald leiðtogafundar Evrópusambandsins frá síðustu helgi en þar tókst ekki að ná samkomulagi um aðgerðir. Í frétt um málið í Jyllands Posten segir að enn sé djúpstæður ágreiningur til staðar meðal leiðtoga helstu evruríkjanna um hvernig bregðast eigi við skuldakreppunni í álfunni.

Aðeins mun vera samkomulag um að veita 110 milljörðum evra í aðstoð við bankakerfi Evrópu svo bankarnir eigi auðveldar með að afskrifa grískar skuldir í bókhaldi sínu.

Fjárfestar hafa vikum saman beðið eftir niðurstöðu fundarins í dag en flest bendir til að þeir verði fyrir vonbrigðum. Rauðar tölur á hlutabréfamörkuðum í Bandaríkjunum í gærkvöldi og í Asíu í nótt, sem og Evrópu í morgun, sýna að fjárfestar telja meiri líkur á að fundurinn endi í klúðri en að árangur náist.