John Terry ekki í hópnum hjá Chelsea í kvöld

John Terry, fyrirliði Chelsea, er ekki í leikmannahópi liðsins í kvöld þegar liðið mætir Everton í enska deildarbikarnum. Það hefur verið mikið umstang í kringum John Terry frá leiknum á móti Queens Park Rangers um helgina en það er þó ekki ástæðan fyrir því að Terry verður ekki með í kvöld.

Andre Villas-Boas, stjóri Chelsea, sagði ástæðuna vera að hann vildi koma í veg fyrir það að Terry fengi spjald í kvöld og yrði í banni í stórleiknum á móti Arsenal um næstu helgi. Didier Drogba og José Bosingwa verða báðir í banni í Arsenal-leiknum vegna rauðu spjaldanna sem þeir fengu á Loftus Road.

Terry er ásakaður um að hafa notað niðrandi orð um Anton Ferdinand í leik Chelsea og QPR um helgina og beitt hann kynþáttaníði sem menn hafa sýnt fram á með myndbandsupptöku af atvikinu. Sjálfur hefur Terry ítrekað neitað sök, segir að um misskilning sé að ræða og að hann hafi útkljáð sín mál við Anton Ferdinand eftir leikinn.