Ólafur: Svekktur að hafa ekki tekið öll stigin

Ólafur Þórðarson var í svekktur að hafa ekki náð að krækja í öll 3 stigin gegn FH-ingum núna í kvöld en að sama skapi ánægður með þá baráttu sem sínir menn sýndu í síðari hálfleiknum þegar þeir unnu upp tveggja marka forskot bikarmeistaranna.

„Eftir þennan seinni hálfleik var maður hálf svekktur að hafa ekki tekið öll stigin en að sama skapi vorum við heppnir að vera ekki fleiri mörkum undir í fyrri hálfleik," sagði Ólafur Þórðarson, þjálfari Fylkis, eftir leikinn í kvöld.  FH og Fylkir skyldu jöfn, 2-2, eftir að FH-ingar höfðu verið 2-0 yfir í hálfleik.

„Við fórum vel yfir stöðuna í leikhlénu og það var greinilegt á öllu að algjöra umbyltingu þurfti að gera. Gylfi þurfti að fara út af vegna meiðsla því hann var hálf haltrandi allan fyrri hálfleik og það segir sig sjálft að það munaði um að fá Andra Jónsson inn sem var með frískari fætur“.

„Heilt yfir er ég nokkuð sáttur með leikinn og þetta eru í það minnsta framför frá síðasta leik. Nú þurfum við bara að halda áfram þeirri spilamennskunni sem  við sýndum í seinni hálfleik og þá ættum við að geta fikrað okkur upp töfluna og náð þeim markmiðum sem liði hefur sett sér“.